Sist oppdatert 05.03.06

Bana

Her er link til kart, slopetabell-Herrer og slopetabell-Damer for bana til Selje Golfklubb.

Bana 5 år
Klubben vart stifta 30. oktober 1997, og arbeid med å etablere ei 6 hols bane vart straks oppstarta. Fyrste vinteren / våren vart det laga til driving range, og det vart innkjøpt ballautomat. Mykje småskog langs Hamreelva vart rydda bort, tynna ut og stelt. Etter kvart framstod området som eit parkområde med gamle steingjerde, ei vakker elv og fin lauvskog.

Våren kjem tidleg i Selje, og etter iherdig innsats kunne bana offisielt opnast 1. mai 1998 med representantar frå Norges Golfforbund til stades.

Naturbane
Bana omfattar innmarka til fleire småbruk som det ikkje lenger var lønt i å drive som tradisjonelle jordbruksareal. Eigarane var derfor positive til planene til golfklubben. Dei såg fram til at området skulle bli slått og stelt, og golfklubben har fått frie hender med omsyn til nødvendig forbetringsarbeid. Den fyrste tida vart det teke opp ein del grøfter som gjennom åra hadde gått tette, og dette arbeidet er endå ikkje ferdig.

Steingjerde
I baneområdet er det mange gamle steingjerde. Desse har ikkje alltid hatt same verdi som vi meiner dei har i dag. Nokre plasser treng dei derfor litt opprydning og stell - eit arbeid vi ser fram til å gjere. Desse er med på å gje bana eit særpreg som vi er stolte av.

 

 

 

 

Utvida til 9 hol
For golfklubben vart det neste måle å utvide bana til 9 hol. Arbeidet gjekk litt tregt eit par år, også litt fordi det var nødvendig å «konsolidere» økonomien. For ein liten klubb er utgiftene til nødvendig maskinelt utstyr tunge.

Etter at klubben fekk avtale med alle 7 grunneigarane i området Hamre / Djupedalen, kunne ein starte eit meir målretta arbeid ut på sommaren -02. Klubben har fått verdifull støtte av entreprenør Oddgeir Kvernevik (hovudsponsor), som har vore svært positiv og rimeleg ved leige av maskiner.

Dugnad
Arbeidet med «fairway»'ane vart for ein stor del gjort i 2002. Om vinteren rydda dugnadsgjengar småskog på området, og laga bruer over Hamreelva (som renn gjennom området).Vinteren 2003 byrja arbeidet på 5 nye «green»'ar. Med stor innsats frå nærmedlemmane vart desse planerte og sådde. Midtsommars 2003 kunne vi derfor utvide bana til 9 hol (med 5 provisoriske greenar).

Det er vel rett å nemne at det er nokre få av nærmedlemmane som har lagt ned utruleg mykje tid til dugnadsarbeid for klubben. Dette kan vi berre glede oss over. Men for klubben er det viktig at vi over tid får delt byrdene på fleire.

Etter utvidinga vart bana endå meir spennande og utfordrande. I november 2004 har NGF slopa bana, som no altså er ei fullverdig 9 hols konkurransebane.

Vi vil oppfordre fjernmedlemmane våre til å ta turen til Selje for å oppleve bana.